वणी तालुक्यातील मोहदा गावालगत भरपूर थ्रेशर व खान पट्टे लागलेले असलेल्या पैकी गट क्र. 289 मध्ये श्री बालाजी असोसिएट या खाजगी कंपनीकडून स्टोन थ्रेशर व खाणपट्टा चालविला जात असून, सदर खाणीत मोठ्या प्रमाणावर स्फोटकांचा वापर करून खनन करण्यात येत आहे. ही खाण सुमारे 120 फूट खोल गेली असून, दररोज होणाऱ्या स्फोटांमुळे संपूर्ण गाव हादरत असल्याचा अनुभव ग्रामस्थ व्यक्त करत आहेत.
गावातील नागरिकांनी सांगितले की, या स्फोटांमुळे गावातील अनेक घरांना तडे गेले आहेत. लहान मुले, वृद्ध व रुग्ण यांना याचा विशेष त्रास होत असून, नागरिक घर कोसळेल की काय, अशा भीतीच्या सावटाखाली राहत आहेत.
तसेच खाण व थ्रेशरजवळील शेतीवरही मोठा परिणाम झाला आहे. स्फोटांमुळे शेतात दगड पडतात, जमिनीची आर्द्रता कमी होत असून, धुळीचा थर पिकांवर बसतो. परिणामी, उत्पादन घटले आहे आणि शेतकऱ्यांचे मोठे नुकसान होत आहे. शेतकऱ्यांमध्ये भीतीचे वातावरण असून, भविष्यातील शेती धोक्यात आली आहे. व शेतकऱ्यांना शेतात काम करणे कठीण झाले आहे.
विशेष म्हणजे, या खाणीतून स्फोटकांची वाहतूक करणारी वाहने गावाच्या आतील भागात प्रवेश करत असल्याचे निदर्शनास आले आहे. हर्षल कहाळे यांच्या मालकीची ही वाहने गावामध्ये फिरत असल्याने संभाव्य अपघाताचा धोका वाढला आहे.
ग्रामस्थांचे म्हणणे आहे की, या गंभीर परिस्थितीकडे मोहदा ग्रामपंचायतीकडून पूर्णतः दुर्लक्ष होत असून, गावाच्या सुरक्षिततेसाठी कोणत्याही उपाययोजना करण्यात आलेल्या नाहीत.
