भालर, ता. वणी (जि. यवतमाळ) – भालर ते लाठी या मुख्य रस्त्याच्या (सुमारे 1800 मीटर) नूतनीकरणाची मागणी करत ग्रामस्थांनी वेस्टर्न कोलफिल्ड्स लिमिटेड (WCL) विरोधात तीव्र आंदोलन छेडले. या रस्त्याची अत्यंत खराब अवस्था झाल्याने अपघातांचे प्रमाण वाढले असून, नागरिकांचे दैनंदिन जीवन उद्ध्वस्त झाले आहे. यामुळे ग्रामस्थांनी संताप व्यक्त करत रस्त्यावर उतरण्याचा निर्णय घेतला.
ग्रामपंचायत सदस्य ॲड. राहुल खारकर, संजय देठे, रुपेश ठाकरे, संदीप गौरकर, अक्षय कवरसे, राजू पिंपळकर, मुक्तानंद भोंगळे, रीना लाडे, ललिता गुंडुकवार, रीता बोरकुटे यांच्यासह गावातील महिला, युवक आणि ज्येष्ठ नागरिक मोठ्या संख्येने या आंदोलनात सहभागी झाले होते. शांततेपूर्ण पद्धतीने पार पडलेल्या या आंदोलनात ग्रामस्थांनी WCL विरोधात तीव्र नाराजी व्यक्त केली.
यावेळी शिवसेना (उद्धव बाळासाहेब ठाकरे गट), युवाशक्ती, क्रांतिकारी संघटना आणि संभाजी ब्रिगेड या संघटनांचे पदाधिकारी व कार्यकर्तेही सक्रीयपणे सहभागी झाले. ग्रामस्थांच्या वतीने प्रशासनाला इशारा देण्यात आला की, जर रस्त्याचे तातडीने नूतनीकरण करण्यात आले नाही, तर हे आंदोलन अधिक तीव्र करण्यात येईल.
या आंदोलनाची गंभीर दखल घेत वणी विधानसभा क्षेत्राचे आमदार संजय भाऊ देरकर यांनी घटनास्थळी भेट दिली. त्यांनी आंदोलनकर्त्यांच्या भावना ऐकून घेतल्या व वेकोली प्रशासनाशी तातडीने संवाद साधला. आमदार देरकर यांच्या मध्यस्थीनंतर WCL च्या अधिकाऱ्यांनी रस्त्याच्या नूतनीकरणासंदर्भात लेखी आश्वासन दिले, त्यानंतर ग्रामस्थांनी आंदोलन स्थगित करण्याचा निर्णय घेतला.
यावेळी शिरपूर पोलीस स्टेशनचे ठाणेदार माधव शिंदे यांनी पोलीस प्रशासनासह कायदा व सुव्यवस्था राखण्यासाठी उत्कृष्ट समन्वय साधला. त्यांच्या प्रयत्नामुळे आंदोलन शांततेत पार पडले.
