या पत्राची दखल मा. आमदार साहेबांनी घेतली.
प्रति,
मा. संजय निळकंठराव देरकर
आमदार – वणी विधानसभा मतदारसंघ ७६
विषय: वणी तालुक्यातील मोहदा गाव परिसरातील बेकायदेशीर खाणकाम व स्टोन थ्रेशर संदर्भात तातडीने कारवाई करावी व शेतकऱ्यांना नुकसानभरपाई द्यावी.सविनय निवेदन आहे की,वणी विधानसभा मतदारसंघातील, वणी तहसील अंतर्गत येणाऱ्या मोहदा गाव परिसरात सध्या २० ते २५ पेक्षा जास्त स्टोन थ्रेशर व खाणपट्टे (मायनिंग) कार्यरत आहेत. मागील ३० ते ३५ वर्षांपासून हे उद्योग सुरू आहेत. मात्र मागील ५ वर्षांपासून या उत्खनन व ब्लास्टिंगच्या प्रमाणात मोठ्या प्रमाणात वाढ झाली असून, हे संपूर्ण कार्य बहुतांश वेळा बेकायदेशीर स्वरूपात चालू आहे.या खाणपट्ट्यांमध्ये १२० ते १५० फूट खोल उत्खनन केले जात असून, हे सगळे परिसर शेती क्षेत्र (Farming Zone) मध्ये येते. स्थानिक ग्रामपंचायतीतील सरपंच व उपसरपंच हे भारतीय जनता पक्षाशी संलग्न असून, त्यांच्या माध्यमातून अनेक खाण कंपन्यांनी शेतजमिनी संपादित करून आपले उद्योग उभारले आहेत.
या अव्यवस्थित आणि अनधिकृत उत्खननामुळे:शेतजमिनीवरील धूळ व प्रदूषण यामुळे पीक उत्पादनावर प्रतिकूल परिणाम होत आहे.
सततच्या ब्लास्टिंगमुळे गावातील घरांना तडे जात आहेत आणि गावकऱ्यांच्या मनात भीतीचे वातावरण आहे.
शेतकऱ्यांचे पांदन रस्ते आणि शेत रस्ते थ्रेशर कंपन्यांकडून स्वतःच्या सोयीसाठी मोडून टाकले जात आहेत, त्यामुळे शेतकऱ्यांना फार मोठा त्रास सहन करावा लागत आहे.
ब्लास्टिंग दरम्यान होणाऱ्या दगडांच्या उडणाऱ्या तुकड्यांमुळे शेतकरी व शेतमजूर यांचे प्राण धोक्यात येतात.
या भागात काही जीवितहानीसुद्धा झाल्याचे निदर्शनास आले आहे.गावकऱ्यांचे आरोग्य, विशेषतः वृद्ध, लहान मुले व महिलांचे आरोग्य गंभीर धोक्यात आले आहे.
या गंभीर समस्येकडे प्रशासन पूर्णतः दुर्लक्ष करत आहे. गावकऱ्यांनी अनेक वेळा तक्रारी करून सुद्धा कोणतीही ठोस कारवाई करण्यात आलेली नाही.
म्हणून माझी व गावकऱ्यांची मागणी आहे की –
1. मोहदा गाव व परिसरातील सर्व खाणपट्ट्यांची तातडीने चौकशी करून अवैध खाणकाम व ब्लास्टिंग थांबवावी.
2. जे खाणपट्टे शेती क्षेत्रात बेकायदेशीर उभारले गेले आहेत त्यांच्यावर कठोर कारवाई करण्यात यावी.
3. शेतकऱ्यांचे नुकसान – शेतजमिनीचे, पिकांचे, आरोग्याचे, रस्त्यांचे – याचा सर्वे करून नुकसानभरपाई दिली जावी.
4. भविष्यात अशा प्रकारचा त्रास होऊ नये याकरता संबंधित कंपन्यांवर नियमबद्ध नियंत्रण ठेवण्यात यावे.
आपण याबाबत तातडीने कार्यवाही करून शेतकरी व गावकऱ्यांना न्याय द्याल, ही अपेक्षा.
आपला विश्वासू,
राहुल सुनील पावडे व समस्थ मोहदा गावकरी,
रा.मोहदा पो.वेळाबाई त.वणी जिल्हा – यवतमाळ
