वणी:- कायर ते बाबापुर, बाबापुर ते पिंपरी (का) हा मुख्य मार्ग अत्यंत दयनीय अवस्थेत असून रस्त्यावर मोठमोठे खड्डे पडल्याने नागरिकांच्या दैनंदिन वाहतुकीत मोठी अडचण निर्माण झाली आहे.
विशेष म्हणजे बाबापुर येथील नवसाला पावणाऱ्या गणपतीच्या दर्शनासाठी दरवर्षी मोठ्या संख्येने भाविक या मार्गाने येतात. मात्र रस्त्याच्या दुरवस्थेमुळे भाविकांसह स्थानिक नागरिकांना प्रचंड त्रास सहन करावा लागत आहे.
या संदर्भात शिवसेना वणी तालुका प्रमुख संतोष हरीचंद्र कुचनकर, कुंदन टोंगे, तात्याजी पावडे (सरपंच पिंपरी), पुंडलिक पिंपळशेंडे (संघटक सर्कल प्रमुख, कायर सर्कल), दिवाकर कोल्हेकर, संतोष धांडे आणि प्रविण डोहे यांनी जिल्हा परिषद सार्वजनिक बांधकाम विभागाकडे निवेदन सादर करून रस्ता तातडीने दुरुस्त करण्याची मागणी केली आहे.
अपघातांचे प्रमाण कमी व्हावे, रुग्णवाहिका व इतर वाहतूक सुरळीत व्हावी आणि गणेशभक्तांना कोणताही त्रास होऊ नये, यासाठी त्वरित उपाययोजना करण्यात याव्यात, असे आवाहन शिवसेनेतर्फे करण्यात आले आहे.
“नागरिकांच्या श्रद्धेचा केंद्रबिंदू असलेला नवसाला पावणारा गणपती उत्सव निर्विघ्न पार पडावा, यासाठी प्रशासनाने रस्त्याची तातडीने दुरुस्ती करावी,” अशी मागणी निवेदनातून करण्यात आली.
